【轮证赢家】小心「中长期下降轨」





【轮证赢家】小心「中长期下降轨」放大图片

上个星期喺日线图上画咗支好细支嘅「旗形」出嚟,「旗形」有个特色就係不论「三角旗」定「长方旗」都好,喺旗身争持完之后就会再继续按此前嘅方向行,即按旗桿(上升形态)上行。只係基于今个星期一至四(10月28日至31日)四中全会开幕,唔知市会有咩事发生,免得乐极生悲啫。

依家9点58分,恒指做紧26822点,升155点,比今朝开市时升幅略为扩大,日线图上见恒指连续三个交易日嘅低位一度穿低过10天线,今日就成粒烛完全企于10天线(26709点)之上,反映咗条10天线嘅短期支持力度不错,下方SlowSTC(14,3)虽然仍然处于超买水平,但%K线升穿%D线係一种利好讯号,若后大市喺稍后嘅时间受到个股季绩做好或四中全会有好消息出炉刺激的话,下一步上返27000点,即约100天线(27021点)附近,亦不足为奇;要防嘅就係由今年4月高位开始一直延伸落嚟嘅一条中长期「下降轨」,依家度落去其实同27000点/100天线呢个水平都差唔多,似乎短期嚟计都係以27000作目标先。

睇埋恒指牛熊证街货图,下方牛证再见一层新增街货,就係26600至26699点,呢度就只有7张期指,估计都係呢个位太贴价且要过夜,就算够胆买入呢个位,都未必够姜揸咁多。至于上方最贴价嘅仍然都係26800至26899点,呢度有相当于286张期指,按依家10点10分恒指最高暂时见过26869点计,其实恒指已经踩入咗呢一层嘅範围;再换另一个以50点为一层嘅街货图睇,见到26800至26849点呢度係一张期指街货都无,即係话呢一层所有嘅街货根本就聚晒喺26850至26899点呢度,不过,以恒指暂时高位计,都已经踩到上呢个範围。

即使牛熊两边各自拎多一层街货比嚟比较,都係上方熊证街货多啲,恒指牛(60281),收回价26400点,同现价有逾400点差距,同一收回水平嘅牛证之中槓桿最高,小心嘅係逾13%嘅街货(不过20%嘅都仲有偈倾嘅),吼恒指5分钟图SlowSTC(14,3)落返去超卖位时先好入场。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家

上一篇: 下一篇:

为您推荐